Azərbaycanın infrastrukturu “Şimal–Cənub” nəqliyyat dəhlizi çərçivəsində fəal şəkildə istifadə olunur
3 i̇yun 2026
0000
Sergey Şpadarenka, Belarus Nəqliyyat Elmi-Tədqiqat İnstitutu “Transtexnika”nın aparıcı mütəxəssisi
Biz Belarusun sərgi stendinin təşkilatçılarıyıq. Bu il kollektiv stendlə təmsil olunuruq və burada dörd müəssisə öz məhsul və xidmətlərini nümayiş etdirir. Onların sırasında dəmir yolları üçün avtomatlaşdırma sistemləri istehsal edən Brest Elektrotexnika Zavodu, həmçinin dəmir yolu maşınqayırması sahəsində fəaliyyət göstərən Minsk Vaqon Təmir Zavodu və Qomel Vaqonqayırma Zavodu yer alır. Hər iki müəssisə yük vaqonlarının istehsalı, təmiri və modernləşdirilməsi, eləcə də dəmir yolu sənayesi üçün ehtiyat hissələrinin hazırlanması üzrə ixtisaslaşıb. Sərgidə təqdim olunan iştirakçılar sırasını Belarus Dəmir Yolunun rəsmi daşıyıcısı olan “Belintertrans” dövlət müəssisəsi tamamlayır.
Bu sərgidə artıq üçüncü dəfədir ki, iştirak edirik. Yeni tərəfdaşların cəlb olunması məqsədilə potensial müştərilərlə bir sıra görüşlər keçirmişik və buna görə də iştirakımızın uğurlu olduğunu əminliklə deyə bilərik. Belə beynəlxalq tədbirlər ilk növbədə Belarusun qlobal bazarda nüfuzunun möhkəmləndirilməsinə xidmət edir, eyni zamanda yeni sifarişçilərin tapılmasına və müəssisələrimizin ixrac imkanlarının genişləndirilməsinə şərait yaradır.
Əməkdaşlıq coğrafiyamız kifayət qədər genişdir və yalnız Azərbaycanla məhdudlaşmır. Şirkətlərimiz müxtəlif beynəlxalq istiqamətlər üzrə fəaliyyət göstərir, çünki müasir logistika və nəqliyyat marşrutları regionun bir çox ölkəsini bir-biri ilə əlaqələndirir. Bundan əlavə, Azərbaycanın nəqliyyat infrastrukturu Belarus yüklərinin üçüncü ölkələrə çatdırılması üçün beynəlxalq “Şimal–Cənub” nəqliyyat dəhlizi çərçivəsində geniş şəkildə istifadə olunur.
Sərgidə iştirak bizə yalnız müəssisələrimizin imkanlarını təqdim etmək deyil, həm də Belarus və Azərbaycan arasında logistika marşrutlarının inkişafı üçün yeni müştərilər və işgüzar tərəfdaşlar qazanmaq imkanı verir.
AZ
EN
RU
ZH
