AZ
EN
RU
ZH
Hörmətli qonaqlar,
Xanımlar və cənablar!
Sizi 22-ci Beynəlxalq Nəqliyyat, Tranzit və Logistika “TransLogistica Caspian” sərgisində salamlayıram!
Ötən il ölkəmiz üçün olduqca əlamətdar oldu. Azərbaycanda ilk dəfə olaraq BMT-nin İqlim Dəyişikliyi üzrə Çərçivə Konvensiyasının Tərəflər Konfransının 29-cu sessiyası (COP29) keçirildi. Bu tədbir nəinki ölkəmizin qlobal arenadakı nüfuzunu daha da artırdı, həm də dayanıqlı və innovativ nəqliyyat həllərinin tətbiqi sahəsində yeni təşəbbüslər üçün zəmin yaratdı.
Konfrans çərçivəsində “Dayanıqlı və rəqəmsal Orta Dəhliz və onun hüdudlarından kənar” yüksəksəviyyəli tədbirin keçirilməsi həm Azərbaycana, həm də Orta Dəhlizə olan yüksək inam və etimadın təzahürü kimi qiymətləndirilə bilər.
Cənab Prezident İlham Əliyevin müəyyən etdiyi kurs üzrə Azərbaycanın regionun əsas nəqliyyat və logistika mərkəzinə çevrilməsi istiqamətində müntəzəm qaydada strateji addımlar atılır, genişmiqyaslı infrastruktur layihələri həyata keçirilir, həmçinin nəqliyyat dəhlizləri boyunca yerləşən ölkələrlə sıx əməkdaşlıqlar qurulur.
Ötən il həyata keçirilən infrastruktur layihələri çərçivəsində Bakı – Tbilisi – Qars dəmiryolunun yükaşırma qabiliyyəti artıq 5 milyon tona çatdırılıb. Bu, Orta Dəhliz üzrə tranzit daşımalarının artırılması və regionun nəqliyyat mərkəzi olaraq daha da güclənməsi üçün əhəmiyyətli bir addımdır. Hazırda Bakı Beynəlxalq Dəniz Ticarət Limanının ikinci fazasının tikintisi üzrə işlər davam etdirilir və bu layihə nəticəsində limanın illik yükaşırma qabiliyyəti 25 milyon ton, 500 min TEU səviyyəsinə çatdırılacaq.
Bundan əlavə, ötən il ölkə ərazisindən keçən nəqliyyat dəhlizlərinin inkişafını dəstəkləyən bir sıra əhəmiyyətli beynəlxalq sənədlər imzalanıb. Bunlar arasında Orta Dəhlizin inkişafını nəzərdə tutan “Azərbaycan Respublikası ilə Çin Xalq Respublikası arasında strateji tərəfdaşlığın qurulması haqqında Birgə Bəyannamə”ni və Şimal-Cənub nəqliyyat dəhlizinin inkişafını təşviq edən “Azərbaycan və Rusiya arasında tranzit yükdaşımalarının artırılmasına dair yeni Saziş”i qeyd etmək olar. Bu sənədlər Azərbaycanın beynəlxalq nəqliyyat dəhlizlərində rolunu daha da gücləndirərək regional və qlobal ticarət axınlarına mühüm töhfə verir.
Bütün bu addımların nəticəsi olaraq ötən il ölkəmizdə tranzit daşımaların həcmi 14.5 milyon tona çatıb, Orta Dəhliz üzrə Çindən göndərilən blok qatarlarının sayı 300-ə yüksəlib. Biz inanırıq ki, 2025-ci ildə bu göstərici 1000 blok qatar səviyyəsinə çatacaq. Eyni zamanda Azərbaycanın beynəlxalq yükdaşımalar sahəsindəki strateji rolunun daha da möhkəmləndirilməsi məqsədilə görülən tədbirlər nəticəsində Orta Dəhliz üzrə həm Şərq – Qərb, həm də Qərb – Şərq istiqamətində yükdaşımaların həcmində artım müşahidə olunub. Gələcəkdə Zəngəzur Dəhlizinin açılması ölkə ərazisindən keçən dəhlizlər arasında strateji birləşdirici rol oynayaraq ticarət əlaqələrini artıracaq və regional əməkdaşlığı gücləndirəcək.
Hazırda nəqliyyat siyasətimizin əsas vəzifəsi qabaqcıl dünya təcrübəsini öyrənməklə sektorda yeni ideya və konseptlər irəli sürmək, onların səmərəli həyata keçirilməsini təmin etməkdir. Bu da öz növbəsində ölkənin logistik potensialını maksimum dərəcədə artırmaq üçün texnoloji nailiyyətlərlə gücləndirilmiş səmərəli, etibarlı və proqnozlaşdırıla bilən nəqliyyat sistemlərinin yaradılmasına və inkişafına xidmət edir.
Bu siyasətin davamı olaraq cənab Prezidentin müvafiq fərmanına əsasən, ölkədə bütün nəqliyyat qurumlarını bir çətir altında birləşdirən platforma – “Azərbaycan Nəqliyyat və Kommunikasiya Holdinqi (AZCON)” yaradılıb. Bu Holdinq nəqliyyat və kommunikasiya sahələrində fəaliyyət göstərən dövlət müəssisələrinin işinin təkmilləşdirilməsinə və onların vahid mərkəzdən idarə edilməsinə xidmət edəcək.
Nəqliyyat sektorunun rəqəmsallaşması istiqamətində də mühüm addımlar atılır. Əməliyyatların səmərəliliyini artırmaq üçün təchizat zəncirinin bütün iştirakçılarının məlumat bazalarını birləşdirəcək vahid rəqəmsal platforma hazırlanır. Bu platforma nəqliyyat xidmətlərinin daha şəffaf və səmərəli həyata keçirilməsinə imkan yaradacaq. Məlumatların vahid bir bazada toplanması, həmçinin müxtəlif nəqliyyat növləri arasında əlaqələrin optimallaşdırılması, daşımaların düzgün və vaxtında həyata keçirilməsini təmin edəcək.
Əziz sərgi iştirakçıları,
Əminəm ki, builki “TransLogistica Caspian” sərgisi də ötən illər olduğu kimi yeniliklərin nümayişinə, həmçinin yeni işgüzar əlaqələrin qurulmasına mühüm töhfə verəcək. Sərginin təşkilatçılarına və iştirakçılarına uğurlu və məhsuldar fəaliyyət arzulayıram.
Təşəkkür edirəm!
Hörmətlə,
Rəşad Nəbiyev
Azərbaycan Respublikasının rəqəmsal inkişaf və nəqliyyat naziri
